Kompania e njohur në fushën e inteligjencës artificiale, OpenAI, po planifikon një rritje të madhe të kapaciteteve njerëzore, duke synuar pothuajse dyfishimin e stafit të saj brenda dy viteve të ardhshme.
Sipas planeve të bëra publike, numri i punonjësve pritet të rritet nga rreth 4,500 aktualisht në afro 8,000 deri në fund të vitit 2026.
Fokusi kryesor i këtij zgjerimi do të jetë në fusha kyçe si zhvillimi i produkteve, inxhinieria, kërkimi dhe shitjet. Paralelisht, kompania po shton edhe rekrutimin e specialistëve në “mbështetje teknike”, me qëllim që bizneset të përfitojnë më shumë nga përdorimi i mjeteve të saj.
OpenAI, e njohur për krijimin e ChatGPT, ka përjetuar rritje të ndjeshme edhe në aspektin financiar. Raundi i fundit i financimit e ka vlerësuar kompaninë në 840 miliardë dollarë, pasi gjigantët e teknologjisë dhe SoftBank i udhëhequr nga Masayoshi Son iu bashkuan investimit të madh prej 110 miliardë dollarësh.
Ndërkohë, raportohet se CEO i kompanisë, Sam Altman, kishte ndërmarrë masa urgjente në fund të vitit të kaluar, duke aktivizuar një “alarm të kuq” të brendshëm. Kjo përfshinte ndalimin e projekteve jo thelbësore dhe riorientimin e ekipeve drejt përshpejtimit të zhvillimit, si reagim ndaj konkurrencës në rritje nga Google Gemini.
