Kryeministri i Kosovës, Albin Kurti, ka zhvilluar sot një takim me komandantin e misionit të NATO-s në Kosovë, KFOR, gjeneralmajorin Ozkan Ulutash. Takimi u fokusua në bashkëpunimin ndërmjet institucioneve të Kosovës dhe misionit të NATO-s, si dhe në zhvillimet që lidhen me sigurinë në vend.
Në një komunikatë për media nga Zyra e Kryeministrit thuhet se, në fillim të takimit, komandanti Ulutash e uroi Kurtin për mandatin e ri qeverisës, ndërsa të dy bashkëbiseduesit diskutuan për bashkëpunimin e ngushtë ndërmjet KFOR-it dhe institucioneve të Republikës së Kosovës.
“Gjatë takimit u trajtua edhe situata e sigurisë, në një kohë kur zhvillimet dhe ndryshimet në botë mund të paraqesin sfida të reja për stabilitetin. Me këtë rast, kryeministri Kurti vlerësoi komunikimin e mirë dhe të vazhdueshëm ndërmjet institucioneve të Kosovës dhe misionit të NATO-s”, thuhet në komunikatë.
Ai gjithashtu e falënderoi komandantin e KFOR-it për kontributin dhe rolin e tij në udhëheqjen e KFOR-it, si dhe për bashkëpunimin me institucionet e Kosovës.
