Prokuroria Speciale e Kosovës ka njoftuar se ka hapur një rast penal lidhur me kërcënimet serioze ndaj presidentes Vjosa Osmani. Rasti është inicuar si vepër penale “Dhunë ndaj përfaqësuesve të lartë të Republikës së Kosovës” dhe trajtohet me prioritet nga autoritetet ligjzbatuese.
Në një komunikatë, Prokuroria bën të ditur se Drejtoria për Hetimin e Krimit të Organizuar dhe Krimeve të Rënda është autorizuar të ndërmarrë të gjitha veprimet e nevojshme për hetimin e plotë të rastit, me qëllim mbrojtjen e rendit juridik dhe sigurinë e zyrtarëve dhe qytetarëve të vendit.
Ky veprim vjen pas njoftimit të Presidencës, e cila paraditen e sotme reagoi në Facebook duke dënuar ashpër gjuhën e përdorur ndaj presidentes, ku sipas saj ishte bërë thirrje për pushkatim. “Kur në debat politik përdoret fjala ‘pushkatim’, kjo nuk ka të bëjë me kritikë apo opinion, por me një gjuhë të rrezikshme që nxit urrejtje dhe normalizon dhunën politike”, thuhet në reagim.
Në komunikatën e Presidencës nuk janë specifikuar personat ose rastet konkrete ku është bërë kjo thirrje për dhunë, por autoritetet theksuan se çështja trajtohet me seriozitet maksimal për sigurinë e presidentes dhe institucionit të shtetit.
