Me rastin e 18-vjetorit të Pavarësisë së Republikës së Kosovës, në Oslo do të organizohet një mbrëmje e veçantë muzikore që sjell në skenë artistë nga Kosova. Ngjarja synon të shënojë këtë përvjetor përmes artit dhe muzikës klasike, duke bashkuar komunitetin shqiptar dhe publikun norvegjez.
Ambasada e Republikës së Kosovës në Norvegji, në bashkëpunim me Filarmoninë e Kosovës, do ta mbajë koncertin më 5 mars 2026, duke filluar nga ora 18:00, në ambientet e Oslo Konserthus (Lille Sal).
Në këtë mbrëmje festive do të performojë “Reverie Quartet”, i përbërë nga anëtarë të Filarmonisë së Kosovës, së bashku me sopranon e njohur, Besa Llugiqi. Programi i koncertit përfshin vepra nga mjeshtërit e muzikës klasike botërore, si dhe perla të përzgjedhura nga krijimtaria muzikore shqiptare.
Sipas Ambasadës së Republikës së Kosovës në Norvegji, ky aktivitet synon të promovojë kulturën dhe artin kosovar në Norvegji, duke forcuar lidhjet kulturore mes dy vendeve dhe duke ofruar për publikun një përjetim të veçantë artistik.
Ambasada ka ftuar bashkatdhetarët dhe artdashësit në Oslo të bëhen pjesë e kësaj mbrëmjeje solemne me muzikën e Kosovës.
