Presidentja e Kosovës, Vjosa Osmani, ka përkujtuar ngjarjet e 28 shkurtit 1998, kur regjimi gjenocidal i Serbisë kreu një nga aktet më brutale të terrorit shtetëror në vend, duke vrarë 24 banorë të Likoshanit dhe Qirezit, përfshirë 20 civilë dhe katër dëshmorë të UÇK-së.
Osmani theksoi se kjo masakër ishte një përpjekje e dhunshme për të shuar shpirtin e lirisë që po lulëzonte në Drenicë dhe në mbarë Kosovën. Sipas saj, gjaku i të rënëve të Likoshanit dhe Qirezit u shndërrua në thirrje për qëndresë, dinjitet dhe liri, duke u bërë pjesë e themelit të rrugëtimit drejt çlirimit dhe ndërtimit të shtetit.
Presidentja nënvizoi se kujtimi i martirëve dhe dëshmorëve të këtyre fshatrave është amanet për drejtësi dhe ruajtjen e lirisë. “Lavdi e përjetshme të rënëve të Likoshanit dhe Qirezit”, përfundoi Osmani.
