Forca e Sigurisë së Kosovës po vazhdon angazhimin e saj në stërvitje ndërkombëtare, duke u bërë pjesë e njërit prej ushtrimeve më të rëndësishme shumëkombëshe në fushën e artilerisë. Përmes një kontingjenti të përbërë nga njësi të këmbësorisë dhe mortajave, FSK-ja po kontribuon në forcimin e bashkëpunimit ushtarak me partnerët strategjikë.
FSK-ja po merr pjesë në ushtrimin ndërkombëtar “Dynamic Front 26”, të organizuar nga Ushtria Amerikane për Evropë dhe Afrikë (USAREUR-AF), me një kontingjent nga Regjimenti i Tretë i Këmbësorisë dhe një tog mortajash.
Ushtrimi fushor “Dynamic Front” është një stërvitje shumëkombëshe që synon testimin e ndërveprueshmërisë së ushtrive të NATO-s dhe forcave partnere në fushën e artilerisë dhe zjarrit indirekt. Këtë vit, stërvitja po zhvillohet paralelisht në pesë shtete: Gjermani, Rumani, Poloni, Spanjë dhe Turqi.
Në kuadër të këtij angazhimi, FSK-ja ka zbarkuar në Gjermani, në Grafenwöhr Training Area, duke sjellë me vete kapacitetet e veta logjistike, përfshirë automjetet, armatimin dhe municionin.
Kontingjenti i FSK-së ka vepruar në bashkëveprim të drejtpërdrejtë me Regjimentin 4-319 të Artilerisë Fushore të Ushtrisë së Shteteve të Bashkuara të Amerikës. Togu i mortajave, me elementët përbërës – Vijën e Zjarrit, Qendrën e Drejtimit të Zjarrit dhe Vëzhguesit e Përparmë – si dhe me mortaja 120 mm, ka realizuar qitje mbi objektiva në koordinim me Ushtrinë Amerikane dhe njësitë e Ushtrisë Italiane.
Gjatë ushtrimit “Dynamic Front 26”, pjesëtarët e FSK-së kanë demonstruar përvojën dhe kapacitetet e tyre profesionale në qitje me mortaja si gjatë ditës ashtu edhe gjatë natës, duke shkëmbyer njëkohësisht përvoja, mësime të nxjerra dhe praktika më të mira me forcat partnere.
Forca e Sigurisë së Kosovës vazhdon të dëshmojë profesionalizëm, disiplinë dhe aftësi të lartë ndërveprimi me partnerët ndërkombëtarë, në funksion të paqes, stabilitetit dhe sigurisë rajonale dhe globale.
