Universiteti i Prishtinës ka arritur një tjetër sukses të rëndësishëm duke u konfirmuar si universiteti më i mirë në gjuhën shqipe, sipas renditjes së vitit 2026 të platformës ndërkombëtare „Webometrics“.
Sipas klasifikimit më të ri, UP-ja renditet në vendin e 2403-të globalisht, një pozicion që shënon nivelin më të lartë që universiteti ka arritur ndonjëherë në këtë platformë. Për krahasim, në janar 2025 UP-ja ishte në vendin e 2543-të, ndërsa në fillim të vitit 2024 renditej e 2605-ta.
Platforma „Webometrics“ vlerëson universitete nga e gjithë bota duke marrë parasysh dukshmërinë globale, prezencën digjitale, cilësinë dhe ndikimin e kërkimit shkencor, transparencën dhe performancën akademike. Renditja e vitit 2026 përfshin mbi 30,000 institucione të arsimit të lartë nga të gjitha kontinentet, duke konfirmuar pozicionin e UP-së si lider ndër universitetet që ofrojnë mësim në gjuhën shqipe.
Ky rezultat pasqyron përpjekjet e vazhdueshme të Universitetit të Prishtinës për të rritur cilësinë akademike, inovacionin dhe prezencën globale në fushën e shkencës dhe arsimit.
