Komisioni Qendror i Zgjedhjeve ka bërë të ditur se procesi i rinumërimit të vendvotimeve pritet të përmbyllet të premten, më 30 janar, pas më shumë se dy javësh punë intensive.
Sipas KQZ-së, rinumërimi ka hyrë sot në ditën e 17-të dhe po zhvillohet sipas planifikimit të paraparë. Zëdhënësi i këtij institucioni, Valmir Elezi, ka dhënë detaje lidhur me ecurinë e procesit dhe përqindjen e votave të rinumëruara deri tani.
“Nga fillimi i këtij procesi (e martë, 13 janar 2026, ora 18:00) dhe deri më tani (e enjte, 29 janar 2026, ora 10:00) janë rinumëruar rreth 88% apo 2,245 nga 2,557 vendvotime. Pra, numri i përgjithshëm i komunave që deri më tani kanë përmbyllur rinumërimin janë 34, ndërkaq kanë mbetur për t’u rinumëruar edhe 312 vendvotime që i takojnë 4 komuave të fundit nga ky proces”, tha Elezi.
Ai shtoi se pritjet janë që edhe vendvotimet e mbetura të përfundojnë brenda dy ditëve të ardhshme.
Sipas tij, “rinumërimi i vendvotimeve të mbetura besojmë se do të kryhet gjatë këtyre dy ditëve”.
I pyetur nëse rezultatet përfundimtare do të shpallen të premten, menjëherë pas përfundimit të rinumërimit, Elezi tha se kjo do të varet nga ora e saktë e përmbylljes së procesit dhe nga vendimi i Komisionit Qendror të Zgjedhjeve.
Elezi ka rikujtuar edhe më herët se “pas përfundimit të rinumërimit, KQZ do të shpallë rezultatin përfundimtar të zgjedhjeve. Ashtu siç parashihet në Ligjin për Zgjedhjet e Përgjithshme, subjektet politike dhe kandidatët do të mund të parashtrojnë ankesat e tyre në PZAP dhe, eventualisht, procesi mund të vazhdojë deri në Gjykatën Supreme. Natyrisht, procesi i rinumërimit i heq të gjitha dilemat sa i përket rezultateve dhe kjo mund të zvogëlojë nevojën për ankesa, por KQZ duhet të presë afatin për paraqitjen dhe shqyrtimin e tyre para se të procedojë me certifikimin e rezultatit të zgjedhjeve dhe njëkohësisht me përmbylljen e procesit zgjedhor”.
Sa i përket vendimit për rinumërim, KQZ kishte marrë dy vendime të ndara. Sipas vendimit të parë, të datës 13 janar 2026, ishte paraparë rinumërimi i 100 për qind të vendvotimeve në 10 komuna: Dragash, Kaçanik, Leposaviq, Prizren, Skënderaj, Shtime, Ferizaj, Vushtrri, Mamushë dhe Ranillug.
Ndërkohë, në 28 komunat tjera ishte vendosur që të rinumërohen nga 10 për qind e vendvotimeve, përfshirë: Deçan, Gjakovë, Gllogoc, Gjilan, Istog, Klinë, Fushë Kosovë, Kamenicë, Mitrovicë e Jugut, Lipjan, Novobërdë, Obiliq, Rahovec, Pejë, Podujevë, Prishtinë, Shtërpcë, Suharekë, Viti, Zubin Potok, Zveçan, Malishevë, Junik, Hani i Elezit, Graçanicë, Partesh, Kllokot dhe Mitrovicë e Veriut.
Megjithatë, pas vendimit të dytë të KQZ-së të marrë më 19 janar 2026, në procesin e rinumërimit u përfshinë edhe vendvotimet e tjera të këtyre komunave.
