Një ngjarje e rëndë është regjistruar sot në autostradën në Veternik të Prishtinës, ku një person është gjetur pa shenja jete brenda një automjeti.
Rasti është konfirmuar nga Policia e Kosovës, e cila ka bërë të ditur se menjëherë pas pranimit të informatës, njësitë relevante kanë dalë në vendin e ngjarjes dhe kanë nisur procedurat hetimore.
“Rreth orës 15:00 kemi pranuar informatën se një person pa shenja jete gjendet në një automjet në Veternik në Prishtinë. Vdekjen e viktimës (mashkull) e ka konstatuar ekipi mjekësor në vend ngjarje.”
Sipas Policisë, rasti po trajtohet në koordinim të plotë me Prokurorinë e Shtetit, ndërsa hetimet janë në vazhdim për të sqaruar rrethanat e vdekjes.
“Policia në koordinim me prokurorin e shtetit ka nisur një hetim mbi vdekjen si dhe po vazhdon me ndërmarrjen e të gjitha veprimeve hetimore dhe të ekzaminimit, që do të ndihmonin hetimin e ngjarjes si dhe sqarimin e plotë të rrethanave të rastit”, ka konfirmuar zëdhënësi i Policisë për rajonin e Prishitnës, Enis Pllana.
Ndërkohë, sipas informacioneve jozyrtare, dyshohet se burri që u gjet i vdekur në veturë mund të ketë kryer vetëvrasje, megjithatë autoritetet kanë bërë të ditur se çdo pistë mbetet e hapur deri në përfundimin e hetimeve.
