Sulmuesi kosovar Vedat Muriqi vazhdon të jetë në qendër të vëmendjes këtë muaj, jo vetëm për golat e shumtë që po shënon, por edhe për ofertat e shumta që ka marrë për transferim. Megjithatë, Muriqi ka shprehur dëshirën për të qëndruar te Mallorca, ku po kalon një formë të shkëlqyer.
Ish-klubi i tij, Fenerbahce, po insiston për ta rikthyer sulmuesin dardan në Stamboll. Sipas mediave turke, FotoMac raporton se klubi nga Stambolli ka bërë një ofertë fillestare prej 12 milionë eurosh, ndërkohë që negociatat me Mallorcan vazhdojnë. Klubi spanjoll synon të përfitojë 16 milionë euro nga shitja e Muriqit, i cili këtë edicion ka shënuar 14 gola në La Liga. Megjithatë, sulmuesi dëshiron të qëndrojë dhe të ndihmojë Mallorcën. “Jam i lumtur këtu dhe kam një kontratë. Kur një sulmues shënon shumë gola, vijnë oferta. Klubi do të vendosë për të ardhmen time, pastaj unë do të marr vendimin tim”, tha Muriqi të shtunën, pas het-trikut të shënuar ndaj Athletic Bilbaos.
Sipas mediave turke, vendimi për të ardhmen e tij mund të merret deri në fund të kësaj jave. Muriqi mund të largohet nga Mallorca ose të qëndrojë për ta thyer rekordin e Samuel Eto’o-s si golashënuesi më i mirë në histori të klubit. Aktualisht ai ka shënuar 48 gola dhe ndodhet vetëm gjashtë gola larg rekordit të kamerunasit, i cili ka 54 gola me fanellën e Mallorcas.
