Një mendje e qetë dhe një qasje pozitive ndaj përditshmërisë mund të jenë çelësi për një gjumë më të mirë dhe më të thellë. Ekspertët theksojnë se mënyra se si përballemi me stresin gjatë ditës ndikon drejtpërdrejt në cilësinë e pushimit gjatë natës.
Sipas një studimi të realizuar nga Universiteti i Ilinoisit dhe i publikuar në revistën Behaviour Medicine, të menduarit pozitiv rezulton të jetë një mjet i fuqishëm kundër pagjumësisë.
Optimizmi përmirëson cilësinë e gjumit
Gjetjet e hulumtimit tregojnë se personat me nivel të lartë optimizmi kanë më shumë gjasa të flenë nga 6 deri në 9 orë në natë. Rreth 74 për qind e tyre raportuan se nuk përjetojnë simptoma të pagjumësisë apo përgjumje gjatë ditës.
Studimi me 3.500 persona
Studimi u bazua në një pyetësor me 10 pyetje dhe përfshiu mbi 3.500 persona të moshës 32 deri në 51 vjeç. Përveç kohëzgjatjes së gjumit, u analizuan edhe cilësia e tij, vështirësitë për të fjetur dhe shenjat e pagjumësisë.
Sa më shumë optimizëm, aq më pak stres
Sipas ekspertëve, ndikimi i mendimit pozitiv në gjumë është i pakontestueshëm. Rosalba Hernandez, udhëheqëse e hulumtimit, shpjegon se njerëzit optimistë arrijnë t’i interpretojnë situatat stresuese në mënyrë më pozitive, duke ulur ankthin që shpesh pengon gjumin e qetë.
Përfitime të tjera për shëndetin
Përveç përmirësimit të gjumit, mendimi pozitiv kontribuon edhe në shëndet më të mirë kardiovaskular, forcim të sistemit imunitar, si dhe në uljen e rrezikut për vdekshmëri dhe sëmundje të rënda, përfshirë kancerin.
Sipas studimit, disa nga faktorët kryesorë që tregojnë një gjumë cilësor janë: të bini në gjumë brenda 30 minutave pasi shtriheni, të flini të paktën 85 për qind të kohës së kaluar në shtrat dhe të mos qëndroni zgjuar më shumë se 20 minuta gjatë natës.
