Pasaporta e Kosovës ka shënuar përmirësim në renditjen globale të fuqisë së pasaportave, sipas përditësimit më të fundit të Indeksit të Pasaportave Henley, një nga matësit më të njohur ndërkombëtarë të lëvizshmërisë pa viza.
Në këtë renditje, pasaporta kosovare pozicionohet në vendin e 62-të në botë, duke u ngjitur për gjashtë pozita krahasuar me vitin 2024, kur renditej e 68-ta. Me këtë dokument udhëtimi, qytetarët e Kosovës mund të udhëtojnë pa vizë në 81 shtete.
Sa i përket vendeve të rajonit, Kroacia ka bërë një hap të madh përpara, duke u renditur në vendin e shtatë në listën e pasaportave më të fuqishme në botë, sipas të dhënave të publikuara në dhjetor.
Me 184 pikë, Kroacia gjendet në të njëjtin nivel me shtete si Mbretëria e Bashkuar, Australia dhe Emiratet e Bashkuara Arabe, duke u pozicionuar në një grup të ngushtë vendesh me shkallë shumë të lartë të lëvizshmërisë ndërkombëtare.
Në krye të listës vazhdon të qëndrojë Singapori, me 193 pikë, i cili për vite me radhë ruan vendin e parë falë fuqisë ekonomike dhe marrëdhënieve të gjera diplomatike, që u mundësojnë mbajtësve të pasaportës së tij qasje pothuajse në të gjithë botën pa nevojë për vizë.
