Procesi i numërimit të votave pas zgjedhjeve lokale ka përfunduar në 2,571 vendvotime të rregullta, ku u numëruan votat për kandidatët për Kryetarë të Komunave dhe për subjektet politike për Kuvendet Komunale, njoftoi zëdhënësi i KQZ-së, Valmir Elezi.
Ai sqaroi se pas përfundimit të numërimit, materialet nga 948 Qendra të Votimit janë transferuar në 38 Qendra Komunale të Numërimit, ku do të numërohen votat për kandidatët për anëtarë të Kuvendeve Komunale. Sipas ligjit për zgjedhjet e përgjithshme, votat për Kryetarë dhe subjektet politike numërohen në vendvotime pas mbylljes së votimit dhe regjistrohen në formularë, ndërsa votat për asamblistë përpunohen në Qendrat Komunale të Numërimit përmes ekipeve të posaçme.
Sa i përket numërimit të votave për anëtarët e Kuvendeve, procesi ka nisur në tri komuna dhe po vazhdon në 35 të tjera. Përveç numërimit, në këto qendra bëhet edhe verifikimi i rezultateve nga formularët e plotësuar pas numërimit në vendvotime.
Në 38 Qendra Komunale të Numërimit janë angazhuar mbi 520 ekipe me më shumë se 2,000 anëtarë, duke garantuar transparencë dhe mbikëqyrje nga vëzhguesit. Përveç numërimit në vendvotimet e rregullta, KQZ ka mundësuar votimin me kusht në 54 vendvotime, votimin jashtë vendvotimeve për 3,467 persona me nevoja të veçanta përmes ekipeve mobile, dhe votimin jashtë Kosovës përmes postës për 43,933 shtetas të Kosovës. /Gjurmuesi/
