Ish-ministri Fadil Ismajli dhe gjashtë persona të tjerë të arrestuar për korrupsion do të paraqiten sot para Gjykatës Themelore në Prishtinë për caktimin e masës së paraburgimit.
Zëdhënësja e gjykatës, Mirlinda Gashi, ka bërë të ditur se seanca dëgjimore do të mbahet të shtunën, më 20 dhjetor, në ora 12:00. Kërkesa për paraburgim u dorëzua nga Prokuroria Speciale e Republikës së Kosovës, e cila pretendon se shtatë të dyshuarit, duke vepruar në bashkëkryerje nga 20 shkurt 2023 deri më 18 dhjetor 2025, kanë kryer veprime me qëllim përfitimi të kundërligjshëm personal.
Sipas Prokurorisë, M.D. dyshohet se, në emër të F.I., ka parashtruar propozim ankesë për ndryshim të vendimit përfundimtar për shpronësimin e pronës, edhe pse afati ligjor kishte kaluar më shumë se tetë vjet. Rasti nuk u kundërshtua nga J.M. dhe Avokatura e Shtetit, duke bërë që disa çështje të përfundojnë me marrëveshje gjyqësore. Vetëm në këtë rast i është shkaktuar buxhetit të shtetit dëm prej mbi 220 mijë eurosh, ndërsa vlera totale e dëmit dyshohet të arrijë shuma milionëshe.
Të pandehurit dyshohet se kanë kryer veprat penale të Keqpërdorimit të pozitës apo autoritetit zyrtar, Marrjes dhe Dhënies së ryshfetit, Ushtrimit të ndikimit dhe Deklarimit të rremë. Fadil Ismajli ka shërbyer si Ministër i Zhvillimit Ekonomik në Qeverinë e Kosovës në vitin 2013. /Gjurmuesi/
