Kompania Rajonale e Ujësjellësit “Hidromorava” ka intensifikuar thirrjet ndaj konsumatorëve që kanë mbetur me obligime të papaguara, duke paralajmëruar masa konkrete ndaj atyre që kanë dy ose më shumë fatura të papaguara.
Sipas njoftimit, nëse borxhet nuk shlyhen me kohë, kompania do të nisë procedurat për shkyçje nga rrjeti i furnizimit me ujë, si dhe veprime përmbarimore ndaj konsumatorëve debitorë.
“Hidromorava” u bën apel qytetarëve që t’i kryejnë pagesat sa më parë, me qëllim që të shmangin ndërprerjen e shërbimit.
Ndërkohë, për konsumatorët që nuk kanë mundësi ta shlyejnë borxhin në tërësi, kompania ofron mundësinë e riprogramimit të pagesave në këste mujore, përmes paraqitjes në zyrat e KRU-së dhe lidhjes së një marrëveshjeje.
