Shteti amerikan i Washingtonit po përballet me përmbytje masive për shkak të shirave të dendur, duke detyruar autoritetet të urdhërojnë evakuimin e dhjetëra mijëra banorëve për të garantuar sigurinë e tyre.
Guvernatori Bob Ferguson ka bërë thirrje që banorët në zonat e rrezikuara të largohen menjëherë dhe të ndjekin udhëzimet e autoriteteve lokale. Urdhrat e evakuimit prekin deri në 100,000 njerëz, ndërsa niveli i ujit pritet të jetë deri në 61 centimetra mbi rekordin e mëparshëm.
“Mbi 30 autostrada kryesore janë mbyllur për qarkullimin e mjeteve”, ka njoftuar Ferguson, i cili shpalli gjithashtu gjendjen emergjente në gjithë shtetin për të mundësuar mobilizimin e shpejtë të fondeve dhe personelit shtesë.
Roja Kombëtare është dislokuar për të ndihmuar në operacionet e shpëtimit, duke përdorur helikopterë dhe varka për të transportuar banorët drejt zonave të sigurta. Dhjetëra lumenj kanë dalë nga shtrati, duke përmbytur qytete dhe toka bujqësore, ndërsa autoritetet vazhdojnë të monitorojnë situatën dhe të koordinojnë ndihmën emergjente. /Gjurmuesi/
