Forca e Sigurisë së Kosovës, në bashkëpunim me Ministrinë e Arsimit, Shkencës, Teknologjisë dhe Inovacionit, po zhvillon ligjërata ndërgjegjësuese për nxënësit e Shkollave të Mesme të Ulëta në Kosovë mbi temën “Rreziku nga mjetet piroteknike”, si pjesë e planit vjetor të aktiviteteve të saj.
FSK-ja sqaron se qëllimi i këtyre ligjëratave është të informojë dhe të sensibilizojë të rinjtë për pasojat dhe rreziqet që mund të shkaktohen nga përdorimi i mjeteve piroteknike, veçanërisht gjatë periudhave festive. “Pjesëtarët e FSK-së po prezantojnë shembuj praktikë, rregullat e sigurisë dhe mënyrat se si fëmijët dhe të rinjtë mund të shmangin incidentet që mund të rezultojnë me lëndime të rënda gjatë përdorimit të këtyre mjeteve”, thuhet në njoftim.
Forca e Sigurisë së Kosovës thekson se mbetet e përkushtuar në misionin e saj për sigurinë e qytetarëve dhe në ndërgjegjësimin e brezave të rinj mbi çështjet që ndikojnë në mirëqenien dhe shëndetin publik. /Gjurmuesi/
