Në Japoni, numri i të moshuarve me demencë që zhduken ka marrë përmasa shqetësuese vitet e fundit. Vetëm gjatë vitit të kaluar, mbi 18 mijë persona të moshuar u larguan nga shtëpitë e tyre dhe u shpallën të zhdukur, ndërsa rreth 500 prej tyre u gjetën të vdekur.
Autoritetet japoneze thonë se këto raste janë dyfishuar që nga viti 2012, ndërsa personat mbi 65 vjeç përbëjnë tashmë pothuajse 30% të popullsisë. Qeveria paralajmëron se shpenzimet për kujdesin ndaj demencës mund të arrijnë në 14 trilionë jen (rreth 77 miliardë euro) deri në vitin 2030 dhe po përdor teknologjinë për t’iu përgjigjur sfidës.
Në disa qytete po aplikohen pajisje GPS dhe sisteme komunitare që mundësojnë gjetjen e personave të humbur brenda pak orësh. Ndërkohë, kompani dhe universitete po zhvillojnë robotë dhe mjete të bazuara në inteligjencë artificiale për të identifikuar shenjat e hershme të demencës dhe për të ndihmuar në kujdesin e përditshëm.
Megjithatë, ekspertët theksojnë se këto teknologji duhet të plotësojnë, e jo të zëvendësojnë, lidhjen njerëzore, e cila mbetet thelbësore për mirëqenien dhe sigurinë e të moshuarve. /Gjurmuesi/
