Barcelona doli me një fitore të rëndësishme dhe plot gola nga vizita te Real Betis, në ndeshjen e xhiros së 15-të të La Ligës, duke marrë tri pikë që e forcojnë pozitën e saj në krye të tabelës.
Katalunasit u gjetën shumë herët në disavantazh, por kthyen rezultatin me një paraqitje të fuqishme dhe fituan me shifrat 3-5, në një duel ku spikati Ferran Torres me hat-trickun e tij.
Real Betis kaloi i pari në epërsi në minutën e pestë, kur Antony shfrytëzoi një rast të hershëm për të tundur rrjetën.
Reagimi i Barcelonës ishte i menjëhershëm. Vetëm gjashtë minuta më vonë, Ferran Torres barazoi rezultatin pas një asistimi nga Jules Kounde (11’). Sulmuesi spanjoll vazhdoi shkëlqimin me një vollej të fuqishëm në minutën e 13-të, duke përmbysur ndeshjen.
Goli i tretë erdhi nga talenti suedez Roony Bardghji, i cili shënoi një supergol në minutën e 31-të pas një pasimi të Pedrit.
Skuadra katalunase gjeti edhe një gol tjetër përmes Ferran Torres, i cili kompletoi het-trikun e tij në minutën e 40-të, sërish pas një asistimi të Pedrit.
Në pjesën e dytë, Barcelona fitoi një penallti pas prekjes së topit me dorë, të cilën e realizoi Lamine Yamal në minutën e 59-të.
Betis tentoi të rikthehej në lojë. Pablo Garcia fillimisht gjeti rrjetën, por goli u anulua për pozitë jashtë loje. Megjithatë, Diogo Llorente shënoi golin e dytë për vendasit pas një rivendosjeje nga këndi në minutën e 85-të, ndërsa Cucho Hernandez realizoi golin e tretë në minutën e 90-të.
Fitorja e Barcelonës e mban skuadrën në krye me 40 pikë, katër më shumë se Real Madridi, i cili ka një ndeshje më pak të zhvilluar. Ndërkohë, Real Betis mbetet në pozitën e pestë me 24 pikë. /Gjurmuesi/
