Ushtarët turq të KFOR-it po zhvillojnë stërvitje intensive në Kosovë, duke fokusuar vëmendjen në menaxhimin e situatave me turmë dhe trazira.
Sipas një njoftimi të misionit të NATO-s në Kosovë, këto stërvitje janë realizuar në bashkëpunim me instruktorët hungarezë dhe kanë përfshirë ushtrime intensive për Kontrollin e Turmave dhe Trazirave (CRC). Qëllimi i këtyre aktiviteteve është forcimi i gatishmërisë, qëndrueshmërisë dhe vendimmarrjes efektive të trupave nën presion.
“Në koordinim me trajnerët hungarezë nga Batalioni Taktik Rezervë i KFOR-it (KTRBN), trupat përfunduan ushtrime intensive të Kontrollit të Turmave dhe Trazirave, duke forcuar aftësitë e tyre për të reaguar në mënyrë të qetë dhe të koordinuar në situata sfiduese,” theksohet në njoftim.
KFOR shton se ushtrimet e tilla janë thelbësore për të ruajtur efektivitetin e misionit dhe për të siguruar një mjedis të sigurt për të gjithë qytetarët në Kosovë. /Gjurmuesi/
