Transportuesit urbanë në Prishtinë do të vazhdojnë protestën e tyre për të tretën ditë radhazi të mërkurën, duke paralajmëruar se këtë herë do të përdorin më pak autobusë për të shmangur bllokimin e plotë të komunikacionit, siç ndodhi të martën.
Arsyeja e protestës qëndron te mos-shlyerja e obligimeve financiare nga Komuna e Prishtinës, për shkak të mosmiratimit të buxhetit në kohë. Protestuesit vendosën autobusët para objektit të Komunës, gjë që krijoi kolona të gjata në kryeqytet. Pas takimit të së hënës me ministrin në detyrë të Financave, Hekuran Murati, përfaqësuesit e transportuesve vendosën të kërkojnë zgjidhje vetëm nga Komuna.
Ilmi Gashi, përfaqësues i sindikatës së punëtorëve të “Trafikut Urban”, tha se Ministria ka alokuar 3.2 milionë euro për Komunën, por nga kjo shumë, vetëm 600 mijë euro i janë ndarë “Trafikut Urban”. Ai sqaroi se kjo shumë nuk mbulon borxhet për karburant, paga punëtorësh dhe sigurime shëndetësore, duke rezultuar në një borxh total prej 1.6 milionë eurosh. Gashi tha se ministri Murati ka premtuar të përmbushë pjesën e tij nëse Komuna kryen detyrat e saj.
Kryetari i Prishtinës, Përparim Rama, tha se përgjegjësia është e Qeverisë dhe jo e transportuesve. Ndërkohë, asamblisti i Lëvizjes Vetëvendosje, Gëzim Sveçla, kritikon Ramën dhe Lidhjen Demokratike të Kosovës, duke e akuzuar për “politikë të gabuar” dhe shfaqje teatrale përballë punëtorëve dhe qytetarëve.
Kryetari i LDK-së, Lumir Abdixhiku, kundërshtoi deklarimet e presidentes Vjosa Osmani, duke treguar për përpjekjet e tij për të siguruar votimin e një pakoje financiare që do të garantonte pagesat për RTK-në dhe zgjatjen e buxhetit për tri muaj, por që nuk u realizua për shkak të mosveprimit nga partitë e tjera. Ministri në detyrë i Financave, Hekuran Murati, reagoi duke theksuar se vonesa e mosvotimit nga partitë është tallje me qytetarët.
Ndërkohë, qytetarët e Prishtinës shprehën mllefin e tyre për bllokadën në komunikacion dhe pamundësinë për të lëvizur me autobusë, duke kritikuar përplasjet dhe mungesën e përgjegjësisë së politikës lokale. /Gjurmuesi/
