Autoritetet polake kundër monopolit kanë nisur hetime ndaj Apple për të vlerësuar nëse politika e privatësisë së kompanisë po kufizon konkurrencën në tregun e reklamave për celularë. Ky hetim ndodh ndërsa disa vende të tjera evropiane po shqyrtojnë gjithashtu praktikën e gjigantit teknologjik.
Zyra Kundër Monopolit e Polonisë (UOKiK) po shqyrton kuadrin e Transparencës së Gjurmimit të Aplikacioneve (ATT), të prezantuar nga Apple në iOS 14.5 dhe versionet më të reja. Dyshohet se ATT mund të kufizojë aftësinë e aplikacioneve të palëve të treta për të mbledhur të dhëna përdoruesish për reklama të personalizuara, duke favorizuar në të njëjtën kohë shërbimin e reklamave të vetë Apple.
Presidenti i UOKiK, Tomasz Chrostny, ka deklaruar se “Dyshohet se politika e ATT-së mund t’i ketë mashtruar përdoruesit mbi nivelin e mbrojtjes së privatësisë. Praktika të tilla mund të përbëjnë abuzim me pozicionin dominues të kompanisë”.
Nëse hetimi konfirmon shkeljet, Apple mund të përballet me gjobë deri në 10% të të hyrave vjetore në Poloni. Autoritetet antitrust në Gjermani, Itali dhe Rumani po shqyrtojnë gjithashtu politikat e ATT-së, ndërsa në mars një autoritet francez vendosi një gjobë prej 150 milionë eurosh ndaj kompanisë. /Gjurmuesi/
