Seria Galaxy A e Samsung, e cila ka qenë pa një model të ri për disa vite, duket se po përgatitet për rikthim me një pajisje të re. Pas Galaxy A73 të vitit 2022, kompania duket se po planifikon lansimin e Galaxy A77, i cili është shfaqur tashmë në bazën e të dhënave të Geekbench.
Prototipi i Galaxy A77 vjen me 8GB RAM, Android 16 të integruar dhe një çipset misterioz që lidhet me Exynos 2400 dhe 2400e, por me një konfigurim të orës së CPU-së më të ulët se këto dy modele. SoC i ri ka tre bërthama Prime të akorduara deri në 2.78GHz, tre bërthama performance deri në 2.3GHz dhe katër bërthama efikasiteti deri në 1.82GHz.
Kjo e bën pajisjen të ketë gjithsej dhjetë bërthama si Exynos 2400 dhe 2400e, por me frekuenca më të ulëta, duke e përshtatur më shumë për një smartphone të nivelit të lartë-mesëm sesa për një flagship. Kjo mund të nënkuptojë përdorimin e çipseteve të nivelit të ulët të familjes Exynos 2400, të cilat Samsung mund t’i shfrytëzojë në këtë mënyrë.
Derisa specifikimet e tjera të Galaxy A77 mbeten të panjohura, pritet që ai të lançohet së bashku me A57, i cili gjithashtu u testua kohët e fundit në Geekbench. Nëse ky plan mbahet, pajisja mund të arrijë në treg rreth muajit mars. /Gjurmuesi/
