Ministria e Punëve të Jashtme dhe Diasporës së Kosovës ka reaguar një ditë pas lirimit të ish-policit Arbnor Spahiu nga paraburgimi në Serbi, duke e konsideruar rastin si të motivuar politikisht dhe të pabazuar në prova. MPJD-ja thekson se paraburgimi i zgjatur i Spahiut shkelte të drejtën për një proces të rregullt dhe trajtim të drejtë.
Spahiu ishte arrestuar në qershor të këtij viti në pikën kufitare mes Serbisë dhe Hungarisë, nën akuzën për “vrasje të rëndë” lidhur me ngjarjet në Banjskë të vitit 2023. Gjatë sulmit ndaj policisë nga një grup paraushtarak serb, tre sulmues u vranë dhe tre të tjerë u plagosën, ndërsa pjesa më e madhe e tyre u largua në Serbi, ku disa vazhdojnë të strehohen. Serbia nuk ka gjykuar as Milan Radoiçiqin, i cili mori përgjegjësinë për sulmin.
MPJD-ja ka kërkuar ndërprerjen e praktikës së Serbisë për përdorimin e sistemit të drejtësisë si mjet për presion politik ndaj qytetarëve kosovarë. Ministria vlerëson se lirimi i Spahiut konfirmon se akuzat serbe nuk kishin bazë dhe falënderoi institucionet vendore dhe ndërkombëtare që kontribuan në trajtimin e drejtë të rastit.
Ish-polici Spahiu, i liruar të premten, ka bërë të ditur në rrjetet sociale se është arrestuar padrejtësisht që nga 7 qershori dhe se i gjithë procesi kishte natyrë politike. Ai falënderoi të gjithë ata që e mbështetën gjatë periudhës së paraburgimit dhe tha se ndihet më i fortë se kurrë.
Ministrja në detyrë e Punëve të Jashtme, Donika Gërvalla, kishte kërkuar lirimin e Spahiut edhe gjatë kalimit në Këshillin e Sigurimit të Kombeve të Bashkuara, duke mbështetur trajtimin e drejtë të rastit. /Gjurmuesi/
