Procesi për formimin e Qeverisë së re në Kosovë mbetet i bllokuar, ndërsa Lëvizja Vetëvendosje ende nuk ka arritur marrëveshje me partitë e tjera për votimin e të mandatuarit për kryeministër. As thirrja e seancës nuk është caktuar ende para datës së fundit, 19 nëntori, që shënon afatin për krijimin e qeverisë ose për zgjedhje të parakohshme.
Presidentja Vjosa Osmani ka theksuar se ekziston mundësi për zgjidhje për çështje të rëndësishme, përfshirë pagat e punëtorëve të RTK-së dhe fondet nga Plani i Rritjes i BE-së apo marrëveshja me Bankën Botërore, nëse partitë tregojnë vullnet për bashkëpunim. Ajo ka insistuar se themelimi i komisionit për buxhet dhe financa është rruga e vetme për të avancuar këto procese, por nisma e saj është hasur me refuzim dhe kritika.
“Formimi i komisioneve parlamentare nuk ka asnjë arsye të bllokohet. Çdo pretendim se është i pamundur, është i gabuar dhe mashtrues,” ka deklaruar Osmani, duke theksuar se vonesat janë shkaktuar nga të tjerët dhe jo nga presidenca.
Nga ana tjetër, kryetari i Vetëvendosjes, Albin Kurti, ka përqendruar vëmendjen tek themelimi i katër komisioneve të përhershme parlamentare, duke i konsideruar ato si çështje urgjente që kanë ndikim direkt financiar dhe social. Ai ka nënvizuar se periudha 15-ditore për formimin e institucioneve përfundon të mërkurën dhe këmbëngul se këto komisione janë rruga e duhur për të vijuar punën e Kuvendit.
Analistët politikë vlerësojnë se bllokimi 9-mujor i Kuvendit dhe i proceseve të tjera ka krijuar vonesa të panevojshme, duke e vendosur përgjegjësinë kryesore mbi partinë fituese të zgjedhjeve. Nëse të mërkurën kandidatët e mandatuar nuk arrijnë 61 vota, Kosova do të shkojë drejt zgjedhjeve të parakohshme, të planifikuara më së largu për javën e tretë të dhjetorit. /Gjurmuesi/
