Shkolla “Sezai Surroi” në fshatin Bellobrad të Dragashit ka kërkuar ndërhyrje të menjëhershme nga Policia e Kosovës pas shfaqjes së arinjve në këtë zonë. Kërkesa synon sigurimin e një ambienti të sigurt për nxënësit, stafin arsimor dhe banorët e fshatit.
Në një njoftim të publikuar në faqen zyrtare të shkollës në Facebook, theksohet se prania e këtyre kafshëve të egra paraqet rrezik të konsiderueshëm, veçanërisht gjatë orëve të mëngjesit dhe pasdites, kur nxënësit udhëtojnë drejt dhe nga shkolla.
Shkolla ka kërkuar që policia të ndërmarrë masa të menjëhershme për largimin ose eliminimin e arinjve nga territori i fshatit, me qëllim mbrojtjen e jetës dhe sigurisë së komunitetit lokal. /Gjurmuesi/
