Një tragjedi ka goditur qytetin verior libanez të Tripolit, ku dy ndërtesa banesore u shembën, duke shkaktuar vdekjen e 15 personave.
“Tetë persona u shpëtuan të gjallë”, tha drejtori i përgjithshëm i Mbrojtjes Civile, Imad Khreiss, duke shtuar se dy ndërtesat ngjitur ishin shtëpia e 22 banorëve. Autoritetet lokale paralajmëruan se ka mundësi që disa persona të jenë ende të zhdukur.
Pamjet e publikuara në mediat sociale tregojnë momentin kur ndërtesat u shembën, me njërën anë që u lëkund në katet e poshtme para se të dy strukturat të rrëzoheshin pothuajse njëkohësisht.
Kjo fatkeqësi shënon shembjen e pestë të një ndërtese banimi në Tripoli këtë dimër, duke nxjerrë në pah shqetësimet për ndërtesat e vjetra dhe të pamirëmbajtura në qytetin më të varfër të Libanit.
