Procesi i rinumërimit të fletëvotimeve po vazhdon në Qendrën e Numërimit dhe Rezultateve, për vendvotimet për të cilat Komisioni Qendror i Zgjedhjeve ka marrë vendim për rishqyrtim.
Zëdhënësi i KQZ-së, Valmir Elezi, ka bërë të ditur se që nga nisja e këtij procesi, më 13 janar, deri më sot është arritur të përfundojë rinumërimi në një pjesë të konsiderueshme të vendvotimeve të përfshira në vendim.
“ Nga fillimi i këtij procesi (e martë, 13 janar 2026, ora 18:00) dhe deri më tani (e shtunë, 17 janar 2026, ora 10:00) janë rinumëruar 316 nga 914 vendvotime, të cilat u takojnë komunave: Deçan (5/5), Gjakovë (15/15), Gllogoc (7/7), Gjilan (13/13), Dragash (57/57), Istog (6/6), Kaçanik (45/45), Klinë (6/6), Fushë Kosovë (6/6), Kamenicë (5/5), Mitrovicë e Jugut (10/10), Leposaviq (25/25), Lipjan (9/9), Novobërdë (2/2), Obiliq (3/3), Rahovec (8/8), Pejë (14/14), Podujevë (11), Prishtinë (26/26) dhe Prizren (43/235). Sipas të dhënave, deri më tani procesi i rinumërimit është përmbyllur në 19 komuna, ndërkohë gjatë pjesës tjetër të ditës, të tjera komuna, sipas radhës, do të përfshihen në këtë process”, tha ai.
Elezi gjithashtu njoftoi se për të përshpejtuar punën në Qendrën e Numërimit dhe Rezultateve, është rritur kapaciteti operativ.
Ai bëri të ditur se numri i tavolinave për rinumërim është shtuar nga 20 në 26.
