Prej 25 ditësh, forcat e sigurisë dhe familjarët po angazhohen për gjetjen e trupit të 30-vjeçarit Jurgen Karaj nga fshati Fullqet i Klosit, i cili dyshohet të jetë rrëmbyer nga rrjedha e ujit të zallit të Darsit më 10 janar.
Që nga ajo ditë, kërkimet në rrjedhën e lumit Mat nuk janë ndërprerë, me dhjetëra forca të Batalionit të Tretë të Repartit të Këmbësorisë Burrel, familjarë dhe struktura të tjera që kanë qenë çdo ditë në terren.
Që prej 29 janarit, një grup i specializuar nga Forcat e Sigurisë së Kosovës iu është bashkuar kërkimeve, ku mbi 11 persona çdo ditë punojnë krah forcave tona të armatosura. Edhe pse gjithë vija lumore e Matit është kontrolluar disa herë, nuk është gjetur asnjë shenjë e 30-vjeçarit.
Përveç lumit, kërkimet po vazhdojnë edhe në basenin ujor të liqenit të Ulzës. Forcat e Sigurisë së Kosovës kanë përdorur edhe dronin nënujor për të kontrolluar thellësinë e liqenit, por deri më 3 shkurt nuk ka asnjë gjetje të re.
Kërkimet do të vazhdojnë ndërsa prurjet e lumit Mat kanë rënë ndjeshëm ditët e fundit, gjë që rrit mundësinë për një kontroll më të efektshëm nga grupet e angazhuara në terren.
