Një ngjarje e rëndë është raportuar në qytetin Coventry në Britaninë e Madhe, ku trupi i pajetë i një burri është gjetur në një kosh plehrash në një park. Rasti ka nxitur një hetim të gjerë nga policia, e cila po përpiqet të zbardhë rrethanat e vdekjes së viktimës.
Trupi u zbulua nga një qytetar të premten, në një kosh plehrash me rrota dhe kapak të gjelbër. Autoritetet kanë bërë të ditur se hetimet janë ende në vazhdim për identifikimin zyrtar të viktimës dhe për të përcaktuar shkakun e vdekjes. Sipas policisë, ekziston dyshimi se burri mund të jetë goditur nga një automjet para se trupi i tij të dërgohej në park.
Në një përditësim të bërë të hënën, Policia e West Midlands në Britani njoftoi se tre persona janë arrestuar gjatë natës në Blackpool. Të arrestuarit janë një burrë dhe një grua në të 40-at, si dhe një burrë në të 20-at, të cilët dyshohen për vrasje dhe për ndihmë ndaj një shkelësi. Ata aktualisht ndodhen në paraburgim.
Policia gjithashtu bëri të ditur se viktima, që mendohet të jetë mes moshës 40 dhe 50 vjeç, kishte në shpinë një tatuazh të një kryqi me një gjarpër të mbështjellë rreth tij. Hetimet për zbardhjen e plotë të rastit po vazhdojnë.
