Donald Trump ka prezantuar një program të ri vizash që premton qasje të shpejtë dhe afatgjatë në SHBA për individët me pasuri të mëdha, duke nxitur reagime të shumta në rrjetet sociale dhe debate rreth ndikimit të tij. Skema, e quajtur “Karta e Artë Trump”, synon të ofrojë mundësi për shtetësi për personat e kualifikuar dhe të verifikuar që mund të investojnë të paktën 1 milion dollarë.
Trump e përshkroi këtë mundësi si një mënyrë për të mbajtur talentet më të mira në SHBA dhe për të ofruar “hyrje direkte në rrugën për shtetësi” për ata që kontribuojnë në ekonominë dhe bizneset amerikane. “Sa emocionuese! Kompanitë tona të mrekullueshme amerikane më në fund do ta mbajnë talentin e tyre të çmuar,” shkroi ai në rrjete sociale.
Programi ishte prezantuar më herët gjatë vitit dhe lejon blerësit që dëshmojnë se do të sjellin përfitime domethënëse për SHBA-të të aplikojnë për leje qëndrimi në kohë rekord. Kostot fillojnë nga 1 milion dollarë për individë, ndërsa bizneset që sponsorizojnë vizat për punëtorë të huaj duhet të paguajnë 2 milion dollarë, përveç tarifave shtesë. Një version tjetër, më i favorshëm për taksat, do të jetë në dispozicion për 5 milion dollarë.
Lejet e reja të qëndrimit i mundësojnë zotëruesve të aplikojnë për shtetësi pas pesë vjetësh, por Trump ka theksuar se programi është specifik për profesionistë “të nivelit të lartë”. “Ne duam njerëz që janë produktivë,” tha ai.
Programi i ri krahasohet me “Kartën e Gjelbër” tradicionale, e cila lejon emigrantët me të ardhura të ndryshme të jetojnë dhe punojnë përgjithmonë në SHBA. Ky plan i ri ka bërë bujë në rrjete sociale, ku disa e shohin si mundësi të re për investitorët e pasur ndërkombëtarë, ndërsa të tjerë kritikojnë një qasje që lidh shtetësinë me pasurinë. /Gjurmuesi/
