Një studim i ri sugjeron se lojërat e thjeshta, si Tetris, mund të jenë më shumë se argëtim – ato mund të ndihmojnë njerëzit të menaxhojnë kujtimet traumatike të së kaluarës. Kërkimi përfshiu rreth 100 punonjës që kishin kaluar situata stresuese dhe traumatike në vendin e punës, përfshirë ekspozimin ndaj vdekjeve gjatë pandemisë. Rezultatet treguan se ata që luajtën versionin klasik të Tetris-it gjatë trajtimit përjetuan më pak kujtime ndërhyrëse, të njohura si kujtime “të këqija”.
Ekspertët nga Mbretëria e Bashkuar dhe Suedia udhëhoqën studimin, ku një grup prej 40 personash luanin një version të ngadaltë të lojës ndërsa rikujtonin shkurtimisht një përvojë traumatike. Emily Holmes, profesoreshë e psikologjisë në Universitetin Uppsala dhe udhëheqëse e studimit, shpjegoi:
“Edhe një kujtim i vetëm i traumës së kaluar mund të ndikojë fuqishëm në jetën e përditshme, duke rrëmbyer vëmendjen dhe duke lënë njerëzit nën ndikimin e emocioneve të padëshiruara.”
Brenda katër javësh, pjesëmarrësit që morën trajtimin raportuan 10 herë më pak kujtime ndërhyrëse krahasuar me grupet e tjera, dhe pas gjashtë muajsh, 70% nuk kishin më asnjë kujtim të tillë. Përveç reduktimit të kujtimeve të padëshiruara, metoda ndihmoi edhe në përballimin e simptomave të çrregullimit të stresit post-traumatik.
Holmes theksoi se nuk bëhet thjesht fjalë për të luajtur Tetris, por për një trajtim praktik dhe të lehtë për t’u integruar në jetën e ngarkuar të njerëzve. Efekti psikologjik i lojës, i njohur si Efekti Tetris, u identifikua që nga krijimi i saj nga Alexey Pajitnov në vitin 1984, ku disa lojtarë raportojnë se shohin blloqe që bien në ëndrrat e tyre ose ndërtesa që lëvizin në rrugë pas orëve të lojës.
