Spotify ka njoftuar një bashkëpunim me OpenAI, që u mundëson përdoruesve të kërkojnë këngë, të krijojnë lista dëgjimi të personalizuara dhe të marrin rekomandime për podcaste në platformë me ndihmën e ChatGPT.
Herën e parë që përdoruesi aktivizon këtë funksion, atij do t’i kërkohet të lidhë llogarinë e tij Spotify me ChatGPT.
Pasi llogaria të jetë lidhur, përdoruesi mund t’i kërkojë ChatGPT-së këngë, albume, artistë, lista dëgjimi apo podcaste, dhe aplikacioni do të hapë automatikisht Spotify, duke përdorur kontekstin e bisedës për të kryer kërkesën.
Spotify sugjeron që përdoruesit të përfshijnë sa më shumë detaje në pyetjet e tyre – si p.sh. zhanrin, artistin apo temën – për të marrë rezultate më të sakta dhe të përshtatura.
Megjithatë, vlen të theksohet se dëgjimi i muzikës ose podcasteve nuk ndodh brenda ChatGPT, por përmbajtja e rekomanduar mund të hapet direkt në Spotify me një klikim në bisedë.
Ky integrim është i disponueshëm si për përdoruesit falas, ashtu edhe për ata Premium.
Përdoruesit falas mund të shfrytëzojnë katalogun ekzistues të listave të Spotify si Discover Weekly dhe New Music Friday, ndërsa përdoruesit Premium mund të shkojnë një hap më tej, duke lejuar që ChatGPT të krijojë përzgjedhje të reja, plotësisht të personalizuara bazuar në kërkesat e tyre më komplekse.
Integrimi i Spotify me ChatGPT është aktualisht i disponueshëm në anglisht, në 145 vende për përdoruesit falas, Plus dhe Pro të ChatGPT, si në versionin web ashtu edhe në aplikacionet mobile për Android dhe iOS. /Gjurmuesi/
