Sindikatat në Korporatën Energjetike të Kosovës paralajmërojnë grevë nëse kërkesat për rritje të pagave nuk realizohen deri në fund të shkurtit, ka bërë të ditur kryetari i Sindikatës së Re në KEK, Nexhat Llumnica. Vendimi përfundimtar do të merret pas shqyrtimit të pasqyrave financiare të kompanisë.
Llumnica tha se përmes avokatit është kërkuar ndërmjetësim ligjor, por menaxhmenti i KEK-ut ka kërkuar të presin deri më 16 shkurt për të diskutuar kërkesat sindikale, përfshirë rritjen dhe nivelizimin e pagave, veçanërisht për punëtorët e sigurimit fizik. “Në rast se nuk arrihet marrëveshja, do të ndërmarrim hapa sindikalë, përfshirë grevën,” tha ai.
Sipas sindikatës, paga bazë mesatare në KEK është rreth 750 euro, ndërsa kërkesa është që ajo të arrijë 1,100 euro, duke reflektuar diferencën me sektorët e tjerë. Llumnica shtoi se pagat aktuale dhe shpërblimet selektive kanë krijuar pakënaqësi ndër punëtorë, duke theksuar nevojën për trajtim të barabartë të të gjithë stafit.
Ai gjithashtu theksoi kushtet e vështira të punës, sidomos në mihje, ku mungojnë rrugët dhe pajisjet mbrojtëse. “Punëtorët përballen me kushte të rënda, por vazhdojnë të kontribuojnë për prodhim të qëndrueshëm të energjisë,” tha Llumnica.
