Një sasi e madhe e materialit shpërthyes është zbuluar dhe konfiskuar gjatë një aksioni policor të zhvilluar dje në pjesën veriore të Kosovës, duke ngritur shqetësime serioze për sigurinë publike.
Autoritetet kanë bërë të ditur se gjatë kontrollit janë sekuestruar gjithsej 140 kilogramë eksplozivë, për të cilët dyshohet se janë të prodhuar në Serbi. Rasti është duke u trajtuar nga njësitë kompetente të Policisë së Kosovës.
Në lidhje me këtë operacion, në emisionin Info Magazine ka folur shefi i Planifikimit në Operativën e Policisë për veriun, Erduan Baliqi.
“Eksplozivi përmban tiketën që është i vitit të prodhimit në vitin 2014-të. Më tutje nuk mund të flasim më shumë rreth kësaj çështje”, deklaroi Baliqi.
Ai po ashtu vuri në pah se kohëve të fundit është shënuar rritje e bashkëpunimit me qytetarët në veri të vendit, veçanërisht në raportimin e rasteve të dyshimta.
“Andaj edhe ne i thërrasim të gjithë qytetarët e Kosovës, pavarësisht etnisë që çdo informacion që e posedojnë për ndonjë mjet të rrezikshëm, ose armatim ose eksplozivë, të bashkëpunojnë me ne dhe ne do t’i ndërmarrim të gjitha masat e duhura”, deklaroi Baliqi në Info Magazine.
