Prokuroria Speciale e Kosovës ka ndërmarrë hapa konkretë drejt ndjekjes penale për disa nga krimet më të rënda të luftës. Pas aktakuzës së ngritur për masakrën e Reçakut, pritet që shumë shpejt të pasojë edhe aktakuza për krimin ndaj familjes Jashari në Prekaz.
Kryeprokurori i Prokurorisë Speciale, Blerim Isufaj, ka bërë të ditur se përgatitjet për ngritjen e aktakuzës për masakrën në Prekaz janë drejt përfundimit. Ai theksoi se aktakuza do të ngrihet në një afat shumë të shkurtër për krimet e kryera ndaj familjes Jashari.
Sa i përket masakrës së Reçakut, Isufaj konfirmoi se tashmë është ngritur aktakuzë në mungesë ndaj 21 shtetasve serbë, të cilët akuzohen për vrasjen mizore të 45 civilëve shqiptarë më 15 janar 1999. Për të gjithë të akuzuarit janë lëshuar urdhërarrestime.
Sipas tij, Prokuroria ka kërkuar bashkëpunim edhe nga autoritetet e Serbisë, ndonëse ishte e ditur se një përgjigje pozitive nuk do të vinte. Ai shtoi se të gjithë personat e përfshirë ndodhen në Serbi dhe për këtë arsye procedura po zhvillohet në mungesë.
Isufaj bëri të ditur se në masakrën e Reçakut ka qenë i përfshirë edhe Goran Radosavleviq, i njohur me nofkën “Guri”, i cili sipas tij ishte përgjegjësi kryesor i operacionit dhe kishte marrë pjesë drejtpërdrejt në kryerjen e krimit.
Hetimet ndaj tij dhe personave të tjerë vazhdojnë, ndërsa nën hetim pritet të përfshihet edhe ish-gjyqtarja e Qarkut të Prishtinës, Danica Marinkoviq.
Kryeprokurori theksoi se procesi i ngritjes së aktakuzave është shoqëruar me shumë sfida, por dëshmitë janë të shumta. Ngjarjet e asaj kohe janë dëshmuar edhe nga ish-shefi i Misionit Verifikues të OSBE-së, William Walker, ndërsa pritet që në procedurë të thirren edhe dëshmitarë të tjerë ndërkombëtarë.
