Një debat i fortë rreth përdorimit të Inteligjencës Artificiale në strukturat ushtarake amerikane ka nxitur reagime të shumta në internet. Në qendër të diskutimit është përfshirja e kompanive të mëdha të AI në projekte të lidhura me mbrojtjen, çka ka çuar në lindjen e një fushate bojkoti kundër ChatGPT të OpenAI.
Fushata online e quajtur “ QuitGPT ” po fiton mbështetje, duke pretenduar se mbi 1.5 milionë persona kanë ndërmarrë hapa konkretë, si anulimi i abonimeve, shpërndarja e mesazheve të bojkotit në rrjete sociale ose regjistrimi përmes faqes quitgpt.org.
Reagimi erdhi pas raportimeve se OpenAI, kompania e drejtuar nga Sam Altman, arriti një marrëveshje për të vendosur modelet e saj të Inteligjencës Artificiale brenda rrjeteve të klasifikuara ushtarake amerikane.
Çfarë e shkaktoi reagimin negativ?
Javën e kaluar, drejtori ekzekutiv i Anthropic, Dario Amodei, tha se “nuk mund ta pranojë me ndërgjegje të pastër kërkesën e Pentagonit” për akses të pakufizuar në sistemet e Inteligjencës Artificiale të kompanisë.
“Në një grup të ngushtë rastesh, ne besojmë se Al mund të minojë, në vend që të mbrojë, vlerat demokratike”, tha Amodei.
“Disa përdorime janë gjithashtu thjesht jashtë kufijve të asaj që teknologjia e sotme mund të bëjë në mënyrë të sigurt dhe të besueshme”, shtoi ai.
Sipas raportimeve, Anthropic u përball me një afat nga Departamenti i Luftës për të zbutur barrierat e saj etike mbrojtëse, përndryshe rrezikonte të humbiste një kontratë prej 167 milionë eurosh të dhënë korrikun e kaluar për “aftësi prototipi të Al kufitare që përparojnë sigurinë kombëtare të SHBA-së”.
Vetëm disa orë pasi negociatat mes Anthropic dhe qeverisë amerikane dështuan, Sam Altman njoftoi se OpenAI kishte arritur marrëveshjen e saj me Pentagonin.
Altman deklaroi se kompania do të “vendoste modelet në rrjetin e tyre të klasifikuar”.
“Në të gjitha ndërveprimet tona, DoW tregoi një respekt të thellë për sigurinë dhe një dëshirë për t’u bashkuar për të arritur rezultatin më të mirë të mundshëm”, deklaroi shefi i OpenAl.
Ky njoftim erdhi menjëherë pasi presidenti i SHBA-së, Donald Trump, tha se do t’u jepte udhëzime agjencive federale që “TË NDËRPREJNË MENJËHERË” përdorimin e teknologjisë së Anthropic.
