Data 28 dhjetor është zyrtarizuar si dita kur vendi do të shkojë në zgjedhje të jashtëzakonshme, një vendim që vjen pas shpërndarjes së Kuvendit dhe debatit politik që ka përfshirë skenën kosovare. Në të njëjtën kohë, polemikat janë shtuar edhe nga deklaratat e Ramush Haradinajt, i cili ka kritikuar mandatarin Glauk Konjufca për mënyrën si po e udhëheq procesin drejt krijimit të qeverisë.
Kjo datë u përcaktua nga presidentja Vjosa Osmani, pas konsultimeve me përfaqësuesit e partive politike. Ajo tha se 28 dhjetori ishte opsioni më i qëndrueshëm kushtetues, duke pasur parasysh se shumica e partive e mbështetën këtë datë.
Osmani sqaroi se para shpërndarjes së Kuvendit kishte tentuar edhe një herë të siguronte votimin e zgjatjes së buxhetit dhe paketës me pesë marrëveshje ndërkombëtare në vlerë prej 1 miliard euro, por mungoi vullneti politik.
Ajo paralajmëroi se mosratifikimi i këtyre marrëveshjeve dëmton qytetarët dhe dobëson shtetin duke humbur fonde të BE-së dhe Bankës Botërore. Presidentja u bëri thirrje partive që të zhvillojnë fushatë dinjitoze dhe të marrin përgjegjësinë pas rezultatit.
Ndërkohë, Haradinaj ka akuzuar mandatarin Glauk Konjufca për kërkim të votës pa program qeverisës, pa premtime të qarta dhe pa adresuar luftën kundër korrupsionit. Ai kritikoi edhe emrat e propozuar për kabinetin e ri, duke aluduar se po krijohet terren për zgjedhje më 28 dhjetor.
Osmani mohoi çdo aludim politik, theksoi se vendimet e saj janë marrë me vetëdije të plotë dhe refuzoi pretendimet se po favorizon ndonjë parti.
E pyetur për një mandat të dytë në Presidencë, ajo tha se gjithçka varet nga vullneti i qytetarëve pas formimit të institucioneve të reja. /Gjurmuesi/
