Një rast shqetësues është raportuar në orët e para të së dielës në Prishtinë, ku një person ka përfunduar në pranga pas një incidenti që përfshiu armë zjarri dhe dhunë fizike.
Sipas detajeve të para, i dyshuari dyshohet se ka kërcënuar një burrë duke i ekspozuar një armë zjarri, ndërsa viktima është gjetur me lëndime në kokë. Ngjarja ka ndodhur rreth orës 02:00 të mëngjesit.
Viktima është dërguar menjëherë në QKUK për trajtim mjekësor. Policia ka bërë të ditur se ai ka qenë nën ndikimin e alkoolit dhe, pas rikthimit të vetëdijes, nuk ka pasur kujtesë të plotë për mënyrën se si ka ndodhur sulmi.
Gjatë kontrollit, njësitet policore kanë sekuestruar një pistoletë me 19 fishekë, që dyshohet se është përdorur në incident. I dyshuari është shoqëruar në mbajtje me vendim të prokurorit, ndërsa hetimet po vazhdojnë për të zbardhur plotësisht rrethanat.
Policia ka konfirmuar se ngjarja po trajtohet si “mbajtje e paautorizuar e armës” dhe “sulm”, ndërsa priten veprime të tjera procedurale gjatë ditëve në vijim. /Gjurmuesi/
