Një pamje e pazakontë e kapur në qiellin mbi një nga bazat ushtarake më sekrete në botë ka rikthyer sërish debatet rreth objekteve fluturuese të paidentifikuara. Një udhëtar që ndodhej në shkretëtirën e Nevadës pretendon se ka filmuar një objekt të çuditshëm që fluturonte mbi Zonën 51.
Gjatë qëndrimit të tij pranë kësaj zone të ndaluar, ai vuri re një objekt të pazakontë në qiell, i cili nuk i ngjante aeroplanëve të zakonshëm. Anders Otteson tha se bëhej fjalë për një “aeroplan” të paidentifikuar që po fluturonte mbi bazë.
Sipas tij, objekti kishte formën e një “trekëndëshi”, të cilin studiuesit e UFO-ve shpesh e quajnë ‘Dorito’. Otteson, i cili drejton edhe një kanal të dedikuar eksplorimeve të pazakonta, tha se objekti nuk dukej të kishte krahë apo skaje të sheshta, gjë që e bëri edhe më të çuditshëm.
Megjithëse teoritë janë të shumta, ai nuk e përjashtoi mundësinë që objekti të kishte qenë një aeroplan i avancuar. Megjithatë, Otteson theksoi se të njëjtin objekt e kishte parë edhe dy herë të tjera.
Zona 51 njihet prej dekadash si një bazë ushtarake tepër e fshehtë dhe e mbyllur për publikun, duke ushqyer vazhdimisht teori konspirative për aktivitetet që zhvillohen aty.
Prej vitesh, shumë persona kanë pretenduar se në këtë bazë fshihet jeta jashtëtokësore, ndërsa raportime për UFO dhe pamje të pashpjegueshme kanë qenë të shpeshta, duke e mbajtur Zonën 51 në qendër të misterit global.
