Presidentja e Kosovës, Vjosa Osmani, nuk e ka nënshkruar ende dekretin për datën e zgjedhjeve, duke pritur vendimin e Gjykatës Kushtetuese lidhur me çështjen. Kjo u bë e ditur nga këshilltari i saj, Bekim Kupina, i cili theksoi se Presidenca po respekton procesin ligjor dhe është në koordinim me organin më të lartë kushtetues.
Kupina sqaroi se gjatë takimit konsultativ të mbajtur me partitë, ato u informuan se Osmani do të presë për vendimin e Gjykatës Kushtetuese. Ai shtoi: “Nëse Gjykata Kushtetuese e vlerëson si të nevojshme caktimin e një mase të përkohshme, Presidenca e mirëpret atë, duke ritheksuar se masa në asnjë moment nuk paragjykon vendimin përfundimtar të Gjykatës lidhur me kushtetutshmërinë e dekretit”.
Kujtojmë se Lëvizja Vetëvendosje ka dërguar të hënën një ankesë zyrtare në Gjykatën Kushtetuese kundër dekretit të presidentes Osmani për shpërndarjen e Kuvendit. Ky informacion u bë publik nga shefja e Grupit Parlamentar të kësaj partie, Arbërie Nagavci.
