Viti 2025 është përshkruar si një ndër më të rrezikshmit për gazetarët në mbarë botën, sipas raportit të fundit të organizatës Reporterët pa Kufij. Gjatë 12 muajve të fundit, 67 profesionistë të mediave janë vrarë si pasojë e punës së tyre, duke reflektuar rritjen e dhunës ndaj gazetarëve nga grupet ushtarake, paramilitare dhe krimi i organizuar.
Raporti thekson se shumica e viktimave, të paktën 53, janë vrarë nga konflikte dhe rrjete kriminale. Pothuajse 43 për qind e këtyre gazetarëve u vranë në Gaza nga forcat e armatosura izraelite. Në Ukrainë, sipas raportit, ushtria ruse vazhdon të shënjestrojë gazetarët vendas dhe të huaj. Vetëm dy gazetarë të huaj humbën jetën gjatë vitit: fotoreporteri francez Antoni Lallican në Ukrainë dhe gazetari nga Salvadori Javier Hercules në Honduras, ku jetonte prej një dekade. Të gjithë të tjerët u vranë në vendet e tyre.
Sudani është shndërruar në një tjetër zonë shumë të rrezikshme për gazetarët, ndërsa në Meksikë grupet e krimit të organizuar janë përgjegjëse për shumicën e vrasjeve, duke e bërë këtë shtet të dytin më të rrezikshëm në botë për profesionistët e mediave. Aktualisht, 503 gazetarë janë arrestuar në mbarë botën, me Kinën dhe Rusinë në krye të listës, ndërsa Mianmari renditet i treti.
Raporti identifikon gjithashtu 135 gazetarë të zhdukur në 37 shtete, përfshirë pesë nga Kosova që nga lufta e vitit 1998-99. Po ashtu, 20 gazetarë mbahen peng, kryesisht burra, në shtete si Jemeni, Siria dhe Mali, me rebelët Huthi përgjegjës për pengmarrjet në Jemen.
Për herë të parë, raporti përfshin edhe sulmet fizike ndaj gazetarëve. Në Serbi, pas protestave kundër korrupsionit, profesionistët e mediave kanë përjetuar të paktën 98 sulme, shumica nga policia, duke reflektuar një klimë të vështirë për lirinë e shtypit. Në Novi Sad, 16 persona humbën jetën nga shembja e një strehë, ngjarje që nxiti protesta studentore.
Indeksi vjetor i lirisë së shtypit tregon se Kosova shënoi rënien më të madhe, duke u renditur e 99-ta nga 180 shtete, duke qenë më keq se të gjithë vendet e tjera të Ballkanit Perëndimor dhe Bashkimit Evropian. Mali i Zi renditet më lart në rajon, ndërsa Serbia zë vendin e 96-të. /Gjurmuesi/
