Në New York është zyrtarisht përuruar një rrugë e re që mban emrin e heroit kombëtar shqiptar, Isa Boletini.
Kryetari i Mitrovicës, Faton Peci, mori pjesë në ceremoninë e përurimit me ftesë të Kongresit Amerikan, duke theksuar rëndësinë historike dhe simbolike të këtij nderimi. Ai e cilësoi këtë moment si një shenjë respekti ndaj një simboli të pathyeshëm të lirisë dhe si një lidhje të fortë mes popullit shqiptar dhe Shteteve të Bashkuara.
“Isa Boletini në New York është një mesazh i fuqishëm për brezat e rinj se liria dhe dinjiteti janë vlera që duhet mbrojtur çdo ditë. Faleminderit miqve kongresmenë, autoriteteve të New York dhe komunitetit shqiptar për përkushtimin e tyre të palodhur. Diaspora jonë ka qenë dhe mbetet një forcë e jashtëzakonshme e imazhit dhe interesave të Republikës së Kosovës”, shkroi ndër të tjera Peci. /Gjurmuesi/
