Ndihma humanitare e Kosovës për popullin e Gazës ka arritur atje dhe ka nisur shpërndarja e saj për familjet në nevojë, ka bërë të ditur ministrja në detyrë e Punëve të Jashtme, Donika Gërvalla-Schwarz.
Ministrja tha se konfirmimi për mbërritjen e ndihmës ka ardhur dje pasdite, ndërsa paketat e dërguara nga Kosova, me vlerë 500 mijë euro, janë duke u shpërndarë përmes partnerëve humanitarë në terren. Pakoja përmban tenda, pako ushqimore, batanije dhe 158 mijë racione ushqimi të ngrohtë.
“Shpreh mirënjohjen time të sinqertë për Republikën e Turqisë dhe Gjysmëhënën e Kuqe Turke për bashkëpunimin dhe mbështetjen që e bënë të mundur këtë operacion humanitar”, shkroi Gërvalla-Schwarz në rrjetet sociale.
Kjo dërgesë ishte nisur më parë me anije nga porti i Mersinit në Turqi, në kuadër të ndihmës që Qeveria e Kosovës kishte vendosur të ofronte për qytetarët e Gazës. /Gjurmuesi/
