Në Bruksel, gjatë takimit të ministrave të Mbrojtjes së NATO-s, Korridori 8 u njoh zyrtarisht si pjesë e infrastrukturës strategjike të Aleancës. Ky vendim e pozicionon këtë aks – nga porti i Durrësit deri në Detin e Zi – si korridor sigurie për mbrojtje kolektive dhe krijon mundësi të reja bashkëpunimi edhe për Kosovën.
Ministri i Mbrojtjes i Shqipërisë, Pirro Vengu, e cilësoi këtë zhvillim si të rëndësishëm për stabilitetin rajonal dhe rolin e Shqipërisë në planifikimin e operacioneve të NATO-s.
“Të ardhmen e operacioneve ku Shqipëria bën pjesë dhe veçanërisht operacioni i KFOR-it në Kosovë, po vlerësohet rritja e kapaciteteve. Shqipëria do rrisë kapacitetet e saj dhe përfshirjen e saj në këtë mision, përfshirë dhe për herë të parë me forcën e saj ajrore, ndërkohë që në partneritet të ngushtë me Shtetet e Bashkuara të Amerikës dhe komandën amerikane në Evropë, po bëhen të gjitha rivlerësimet e nevojshme për të ardhmen e këtij misioni, çka përbën edhe një okazion shumë të mirë për Qeverinë e re të sapozgjedhur në Kosovë që të rris bashkëpunimin cilësor dhe gjithnjë e më të ngushtë me Aleancën”, deklaroi Vengu.
Ai theksoi gjithashtu se vendet anëtare po rrisin investimet dhe po ristrukturojnë industrinë ushtarake.
“Pika e tretë e bisedimeve i kishte të bënte me mënyrën se si të gjitha vendet aleate jo vetëm po rrisin investimet në mbrojtje, por po ristrukturojnë mënyrën se si industria ushtarake fillon dhe të gjenerojnë më shumë kapacitete”, shtoi ai.
“Shqipëria e ka nisur me vendosmëri këtë rrugë dhe po çdo ditë po krijojmë kapacitete të reja për sa i përket industrisë tonë me disa kontrata të lidhura dhe disa kontrata me negocim e sipër, të gjitha këto elementë u mirëpritën nga mbarë aleatët, ndërkohë që së bashku me kolegët tanë turq dhe me Sekretariatin këtu në Bruksel, skuadrat tona kanë filluar të përgatisin Samitin e Tiranës në vitin dy mijë e njëzet e shtatë”, shtoi Vengu.
