Fundjava pritet të karakterizohet nga mot i ftohtë dhe vranësira të shpeshta, por pa reshje të konsiderueshme. Megjithëse në disa zona do të ketë intervale me diell, temperaturat do të mbesin të ulëta, ndërsa era veriore do ta theksojë ndjesinë e të ftohtit.
Gjatë ditës së premte, vranësirat e ulëta do të dominojnë në të gjithë vendin, pa parashikime për reshje. Herë pas here, sidomos në rajonin e Dukagjinit, priten intervale të shkurtra me diell. Temperaturat minimale do të lëvizin nga -2 deri në 0 gradë Celsius, ndërsa ato maksimale do të arrijnë nga 2 deri në 5 gradë. Era do të fryjë e lehtë deri mesatare nga veriu dhe verilindja, me shpejtësi 3–6 m/s.
Ditën e shtunë, vranësirat do të fillojnë të shpërndahen gradualisht, duke krijuar më shumë hapësira për diell, veçanërisht gjatë pasdites.
Të dielën, depërtimi i masave më të ftohta ajrore mbi rajon do të sjellë sërish vranësira kalimtare, të cilat lokalisht mund të shoqërohen me ndonjë rrebesh të dobët dëbore. Temperaturat minimale do të zbresin deri në -4 gradë Celsius, ndërsa maksimalet ditore do të arrijnë 2 deri në 3 gradë. Era veriore do të jetë mesatare, me shpejtësi 5–11 m/s.
Nga dita e hënë parashihet mot kryesisht me diell, por shumë i ftohtë. Temperaturat minimale do të zbresin nga -5 deri në -7 gradë Celsius, ndërsa maksimalet do të luhaten ndërmjet 2 dhe 4 gradë.
Sa i përket cilësisë së ajrit, qarkullimi më i mirë ajror pritet të ndikojë pozitivisht, duke e mbajtur indeksin kryesisht në vlera të pranueshme dhe të mira. Problematike mbesin orët e mbrëmjes, kur mungesa e erës favorizon grumbullimin e ndotësve pranë sipërfaqes. Në këto raste, vlerat momentale të indeksit mund të kalojnë në nivele shumë të dobëta apo edhe jashtëzakonisht të dobëta, të shënuara me ngjyrë vjollcë.
