Microsoft po transformon dy nga aplikacionet më të vjetra të Windows-it, Paint dhe Notepad, duke u shtuar atyre funksione të reja të bazuara në inteligjencë artificiale. Këto risi synojnë ta bëjnë përvojën e përdoruesit më të avancuar edhe në mjetet më bazike të sistemit operativ.
Përditësimet po shpërndahen aktualisht për përdoruesit e Windows Insiders në kanalet Windows 11 Canary dhe Dev. Ato sjellin veçori që deri tani nuk kanë qenë tipike për aplikacione të thjeshta si këto.
Në Notepad janë shtuar funksione të reja të IA-së, përfshirë rishkrimin e tekstit, përmirësimin e stilit dhe përmbledhjen automatike të përmbajtjes, duke e kthyer aplikacionin në një mjet më praktik për shënime dhe redaktime të shpejta.
Ndërkohë, Paint po pasurohet me aftësi krijuese, si gjenerimi i ilustrimeve digjitale përmes IA-së dhe krijimi i menjëhershëm i faqeve për ngjyrosje. Këto veçori u japin përdoruesve më shumë hapësirë për kreativitet pa pasur nevojë për programe profesionale dizajni. Sipas Microsoft, këto ndryshime janë pjesë e një strategjie më të gjerë për integrimin e IA-së në përdorimin e përditshëm të Windows-it.
Në të njëjtën kohë, përdorimi i shpeshtë i inteligjencës artificiale po ngre edhe shqetësime për shëndetin mendor. Një studim i publikuar në JAMA Network Open tregon se amerikanët që përdorin IA-në çdo ditë shfaqin nivele më të larta të depresionit krahasuar me ata që e përdorin rrallë. “Nivele më të larta të përdorimit të IA-së u shoqëruan me rritje modeste të simptomave depresive”, theksojnë studiuesit, duke shtuar se rreziku për të paktën depresion të moderuar u rrit me rreth 30 për qind te përdoruesit e përditshëm.
Anketa, e zhvilluar mes prillit dhe majit 2025 me 20.847 të rritur amerikanë, tregoi se 10.3 për qind përdorin çdo ditë IA gjeneruese, ndërsa 5.3 për qind u drejtohen chatbot-eve disa herë gjatë ditës. Përdoruesit e rinj rezultuan më të ndjeshëm ndaj efekteve në shëndetin mendor, megjithëse studiuesit theksojnë se ende nuk është e qartë nëse IA shkakton depresion apo nëse individët me prirje depresive kërkojnë më shumë ndërveprim dixhital. Për këtë arsye, kërkohen studime të mëtejshme për të sqaruar natyrën e kësaj lidhjeje.
