Microsoft ka bërë një ndryshim të rëndësishëm në dokumentacionin e saj zyrtar për Windows 11, duke përditësuar listën e procesorëve të mbështetur. Ky dokumentacion synon t’i ndihmojë përdoruesit të dinë se cilët procesorë mund ta ekzekutojnë sistemin operativ pa pasur nevojë për metoda jozyrtare apo “truke” për të kaluar kushtet e sistemit.
Përditësimi i fundit, megjithatë, ka shkaktuar konfuzion. Në vend që të shfaqen modelet e sakta të procesorëve si më parë, tani dokumentacioni liston vetëm seritë e procesorëve. Për shembull, përdoruesit mund të shohin “Intel Core i7 (gjenerata 14)” ose “Intel Core 7000X Series”, pa detaje mbi modelet specifike. Kjo nënkupton që disa procesorë që më parë dihej se ishin të mbështetur, mund të mos shfaqen qartë, ndërsa disa të tjerë që nuk janë të verifikuar si të pajtueshëm mund të duket sikur përfshihen.
Vlen të përmendet se ky ndryshim i qasjes vlen vetëm për procesorët Intel. Për procesorët AMD dhe Qualcomm, lista vazhdon të tregojë çdo model të mbështetur si më parë, duke ruajtur qartësinë për përdoruesit e këtyre markave. /Gjurmuesi/
