Një dosje gjyqësore e zbuluar të premten ka hedhur dritë mbi mënyrën sesi Meta, kompania mëmë e Instagram, ka trajtuar çështjet e trafikut seksual dhe sigurisë së përdoruesve të rinj. Dokumenti përshkruan se rastet e raportuara të trafikimit seksual ishin të vështira për t’u identifikuar dhe shpesh toleroheshin nga platforma.
Ish-drejtoresha e sigurisë dhe mirëqenies në Instagram, Vaishnavi Jayakumar, dëshmoi se kur iu bashkua Metës në vitin 2020, u trondit nga politika e kompanisë që ndëshkonte llogaritë vetëm pas 17 shkeljeve për trafikimin e njerëzve për seks. Ajo theksoi se kjo ishte shumë më e lartë se standardet e zakonshme në industrinë e mediave sociale.
Paditësit argumentojnë se kjo dëshmi mbështetet nga dokumentacioni i brendshëm i Metës. Padia, e depozituar në Qarkun Verior të Kalifornisë, pretendon se kompania ka qenë në dijeni të dëmeve serioze që platforma shkakton tek përdoruesit e rinj dhe ka krijuar një model mashtrimi për të minimizuar përgjegjësitë.
Sipas dokumentit, Meta ishte e vetëdijshme se miliona të rritur të panjohur kontaktonin të mitur, se produktet e saj përkeqësonin problemet e shëndetit mendor tek adoleshentët, dhe se përmbajtje që lidhet me çrregullimet e të ngrënit, vetëvrasjen dhe abuzimin seksual të fëmijëve shpesh zbulohej, por rrallë hiqej.
Padia thotë se kompania nuk e informoi publikun ose Kongresin për këto dëme dhe refuzoi të zbatonte rregullime sigurie që mund t’i kishin mbrojtur përdoruesit e rinj. Avokati Previn Warren e krahasoi këtë situatë me duhanin, duke theksuar se Meta vazhdoi t’i tregtonte produktet që shkaktojnë varësi tek fëmijët për të rritur fitimet.
Kjo padi është pjesë e një procesi gjyqësor të madh shumë-rrethor, ku mbi 1,800 paditës, përfshirë fëmijë, prindër, distrikte shkollore dhe prokurorë të përgjithshëm shtetërorë, akuzojnë kompanitë mëmë të Instagram, TikTok, Snapchat dhe YouTube për ndjekjen e një strategjie rritjeje “me çdo kusht”, duke injoruar ndikimin tek shëndeti mendor dhe fizik i fëmijëve.
Dokumenti i publikuar përmban citate dhe fragmente nga mijëra faqe dëshmish dhe komunikime të brendshme të kompanisë, duke treguar për shqetësimet që punonjësit brenda Metës kishin ngritur për produktet e platformës dhe pengesat që kishin hasur nga drejtuesit për të implementuar masa sigurie.
Meta mohon akuzat, duke theksuar se dokumenti përmban citate të zgjedhura me kujdes dhe se kompania ka punuar për më shumë se një dekadë për të përmirësuar sigurinë e adoleshentëve, duke përfshirë prezantimin e Llogarive të Adoleshentëve me mbrojtje të integruar dhe kontrolle për prindërit. /Gjurmuesi/
