Një histori frymëzuese vjen nga Shtetet e Bashkuara, ku një mësuese e gjuhës angleze ka hyrë në librin e rekordeve botërore falë përkushtimit të saj të jashtëzakonshëm në arsim.
Beverly Hannett-Price, 90 vjeçe, e cila vazhdon të japë mësim në Detroit Country Day School në Michigan, është nderuar me Rekordin Botëror Guinness për karrierën më të gjatë si mësuese e gjuhëve (femër), që zgjat plot 67 vite.
Certifikata i është dorëzuar gjatë një ceremonie surprizë të organizuar posaçërisht për të. Në këtë ngjarje mori pjesë edhe aktori i njohur Courtney B. Vance, ish-nxënës i saj, i cili theksoi ndikimin e madh që ajo ka pasur në rrugëtimin dhe formimin e tij personal e profesional.
Hannett-Price ka nisur mësimdhënien që në vitin 1958, ndërsa ndër ish-nxënësit e saj përfshihen edhe figura të njohura botërore si Robin Williams dhe Steve Ballmer.
Edhe pse ka mbushur 90 vjeç, ajo thekson se nuk mendon të dalë në pension.
“E dua këtë shkollë dhe e dua mësimdhënien”, u shpreh ajo gjatë ceremonisë së nderimit.
